Psalm 125

		Canticum graduum.
125	1	In convertendo Dominus captivitatem Sion : facti sumus sicut consolati :
125	2	Tunc repletum est gaudio os nostrum : et lingua nostra exultatione. Tunc dicent inter gentes : Magnificat Dominus facere cum eis.
125	3	Magnificat Dominus facere nobiscum : facti sumus letantes.
125	4	Converte Domine captivitatem nostram, sicut torrens in austro.
125	5	Qui seminant in lacrymis, in exultatione metent.
125	6	Euntes ibant et flebant, mittentes semina sua. Venientes autem venient cum exultatione, portantes manipulos suos.

Psalm 126

		Canticum graduum.
126	1	Nisi Dominus edificaverit domum, in vanum laboraverunt qui edificant eam. Nisi Dominus custodierit civitatem, frustra vigilat qui custodit eam.
126	2	Vanum est vobis ante lucem surgere : surgite postquam sederitis, qui manducatis panem doloris. Cum dederit dilectis suis sompnum :
126	3	ecce hereditas Domini filii : merces, fructus ventris.
126	4	Sicut sagitte in manu potentis : ita filii excussorum.
126	5	Beatus vir qui implevit desiderium suum ex ipsis : non confundetur cum loquetur inimicis suis in porta.

Psalm 127

		Canticum graduum.
127	1	Beati omnes qui timent Dominum, qui ambulant in viis eius.
127	2	Labores manuum tuarum quia manducabis : beatus es, et bene tibi erit.
127	3	Uxor tua sicut vitis abundans, in lateribus domus tue. Filii tui sicut novelle olivarum, in circuitu mense tue.
127	4	Ecce sic benedicitur homo, qui timet Dominum.
127	5	Benedicat tibi Dominus ex Sion : et videas bona Hierusalem omnibus diebus vite tue.
127	6	Et videas filios filiorum tuorum, pacem super Israel.

©CHD Erik Drigsdahl 1991-2001; Last update 24.09.2001